February 11, 2005

Album Review: Alon

Ang taong 2004 ay isang magandang taon para sa musikang Pinoy.

Ang daming nagsasabi na pabagsak na raw ang industriya ng musika sa ating bansa dahil sa paglipana ng mga novelty at mga generic na pop songs. Pero ang mga taong ito na nawawalan na ng pag-asa sa musikang sariling atin ay hindi lang marunong maghanap (o makinig?). Sa malaking mundo ng musikang Pinoy sa labas ng limitadong mga playlist ng mga commercialized pop music stations, ang 2004 ay naging saksi sa muling paglipana ng isang buhay na buhay na "alternative scene". Karamihan sa kanila ay mga "indie" - hindi nasasailalim sa isang major record label - kaya't mas malaya sila sa pagbuo ng kanilang sining.

Isa sa mga naglabas ng self-produced indie album noong nakaraang taon ay si Bayang Barrios, ang pangunahing nagwagi sa 2004 Metropop Song Festival. Nagngangalang Alon, ang album na ito ang ikatlong koleksyon ng mga kanta ni Bayang. Marami-rami rin akong nabili't napakinggang magagandang OPM album na nilabas noong 2004, ngunit di ako magkikiming sabihin na ito ang pinakamaganda sa lahat. Ang laking swerte talaga't ako'y "nagpatangay" sa Alon.

Una kong narinig kumanta si Bayang sa isang hard-to-find na live album ni Joey Ayala at ng Bagong Lumad. Doo'y nag-duet sila ni Joey sa kantang "Walang Hanggang Paalam." Noon pa lang ay nabighani na ako sa boses ni Bayang. Muli ko siyang narinig sa kantang "Bagong Umaga", ang entry ng kanyang asawang si Mike Villegas nang muling buhayin ang Metropop Song Festival noong 1996. Ang kantang ito (na malamang kilala ng marami sa inyo bilang campaign jingle ni FPJ) ay naging parte ng unang album ni Bayang, ang Bayang Makulay. Ang debut album na ito ay nag-ani ng papuri at nanalo ng CMMA Album of the Year noong 1997.

Walong taon mula nang lumabas ang Bayang Makulay, muling nag-collaborate sina Bayang ang ang kanyang asawang si Mike upang buuin ang album na Alon. Tulad ng kanyang unang album, maaasahan ang maganda't madamdaming vocal performance at musikang may fusion ng ethnic, rock at folk na flavor. Pero di tulad ng unang album kung saan parang nangangapa pa si Bayang sa paghanap ng karakter sa kanyang mga kanta, ang Alon ay nagpapakita ng isang Bayang na mas kilala ang kanyang sarili at ang kanyang musika. Marahil resulta na rin ito ng pag-mature niya bilang isang artist. Paghinog sa panahon, ayon nga sa mga matatanda.

May labindalawang kanta ang album, lahat sinulat sa wikang Pilipino (labing-isang Tagalog at isang Bisaya):

  • "Alon" - ang title track at carrier single ng album. Taglay ang isang nakaka-hook na radio-friendly na melody, ito ang may pinakamalaking tsansa sa mga kanta sa album na ito na maka-breakthrough sa mainstream. Gustong gusto kong napapakinggan yung pambungad na linyang "Traysikel..." ni Bayang. At talagang rinig ko ang pagka-"Mike Villegas" ng pagkakasulat ng kanta. Dapat talagang marinig ito ng mas maraming tao.
  • "Asya" - si Bayang nagra-rap? Oo. At di lang basta rap. Ethnic rap pa!!! Marahil ay kung iba ang nagsulat ng kantang ito, hindi ito magiging maganda. Buti na lang na ang maestrong si Ryan Cayabyab ang naglapat ng musika sa continentalistic (imbis na nationalistic) na lyrics ni Nanding Josef. Pero nakakapanibago talagang marinig mag-rap si Bayang!!!
  • "Sa Piling Mo" - ito ay ililista ko na sa lineup ng mga kakantahin sa kasal ko. Makabagbag-damdamin at tunay na nakaka-in love. Sinulat ni Ronnie at Gigi Cordero.
  • "Matagal Mo Nang Mundo" - sunod sa "Alon", ito ang may susunod na potensyal na maka-breakthrough sa mainstream. Sinulat ni Mike Villegas sa style na nagpaalala sa akin sa mga kantang naisulat niya para sa Color It Red.
  • "Malayo Man, Malapit Din" - ang kantang pinanalo ni Bayang para sa Metropop. Tunay itong karapat-dapat na manalo ng isang award at magsilbing isang milestone sa songwriting talent ni Bayang. Ito ang masayang counterpart ng "Walang Hanggang Paalam" ni Joey Ayala.
  • "Isipin Mo Na Lang" - malakas ang tama ng kantang ito sa akin ngayon dahil nasa malayong lugar ang aking iniibig. Ito'y kasama na ng kantang "Dagat" ni Gary Granada sa pagiging pinakamaramdaming kanta tungkol sa pangungulila. Sinulat ni Mike Villegas.
  • "Nag-iisang Mundo" - isang rock song tungkol sa pagsagip sa kalikasan, nakakatuwa ang perspektibo nito kung saan ang anak ang siyang nagbibigay na paalala sa kanyang magulang. Kung iisipin naman natin, ang mga bata nga naman talaga ang kawawa sa paninirang ginagawa natin ngayon sa kalikasan. Sinulat ni Bayang at ni Mike.
  • "Halik ng Hangin" - muli, isang kanta na tungkol sa pangungulila. Ngunit kung ang "Isipin Mo Na Lang" ay may temang sentimental, eto naman ay "sexy" at nagpapadama ng pisikal na pangungulila. Sinulat ni Bayang Barrios.
  • "Asa Ka Nang Asa" - ang ganda ng laro ng mga salita sa korus ng kantang ito. "Asa ka nang asa ka nang asa; A saka na nga saka na nga." Inspirational ang mensahe, at nagbibigay ng motibasyon na hindi hadlang ang kahirapan sa pag-unlad at ito'y madadaan sa pagsisikap. Ngunit ito rin ay parinig sa mga taong asa lang nang asa at wala namang ginagawa. Sinulat ni Bayang Barrios.
  • "Naglalakbay" - ang paborito kong kanta sa album. Mapaglaro ang kanta at maganda ang ethnic arrangement. Ito ang nagpapaalala sa akin kung bakit kinuha ng DOT si Bayang upang kantahin ang background music sa kanilang WOW Philippines campaign. Sinulat ni Bayang Barrios.
  • "Buhi sa Kanunay" - ang natatanging kantang bisaya sa album. Isang pagpupugay sa ugat na pinagmulan ni Bayang. Minsa'y kinanta na rin ni Bayang ang Tagalog version ng kantang ito sa album na Saranggola sa Ulan ni Gary Granada.
  • "Alon (Dapithapon)" - isang acoustic version ng title track. Ang mas malumanay na rendition ng unang kanta sa album ay nagbigay ng isang magandang sense of closure.

Tunay na isang obra ang Alon, lalo na sa panahong ang mainstream OPM ay dinodomina ng mga kantang kulang sa originality, identity, inspiration at substance. Marami ang ayaw sumubok sa alternative, sa takot na baka di magustuhan ng kanilang tenga ang kanilang maririnig. Ngunit sa totoo lang, karagdagang exposure lang ang kailangan ng musikang tulad ng mga awit ni Bayang. Sa ngayon kasi, iisang FM station pa lang sa Mega-Manila ang nagpapatugtog nang regular ng mga kantang galing sa Alon. Tulad ng ngalan nito, dumating sana ang araw na ang Alon ay makarating sa malayo upang mamulat ang maraming Pilipino sa ganda ng sining na tunay na maipagmamalaki nating Pinoy na Pinoy.

----------
Iboto ang Alon sa NU 107 Mindnight Countdown. I-text ang NU MIDNIGHT ALON BAYANGBARRIOS sa 2299, o kaya nama'y i-text ang NU ALON BAYANGBARRIOS sa 209. Suportahan ang makabuluhang musikang Pilipino.

Gusto mo ba ng album na Alon? Sagutin mo muna ang tanong: Anong indigenous tribe ang pinag-ugatan ni Bayang Barrios? Ipadala ang sagot sa akosipaeng@gmail.com at magkaroon ng tsansang mapanalunan ang album!!!

No comments: