September 20, 2005

Ganito kami noon, paano na kaya ngayon?

"Bakit ganun? Si Erap na halal na presidente, nanguha lang ng pera mula sa jueteng, pinatalsik na natin. Si GMA, ginastos ang pera ng bayan, nandaya sa eleksyon, tapos pinagkanulo pa ang Pilipinas, hindi pa napapatalsik?"

Ito ang isa sa mga topic sa usapan namin kanina sa faculty room. Ang hirap kasing isipin na ilang buwan pagkatapos pumutok ng Hello Garci controversy, nandiyan pa rin sa puwesto si Gloria. Kung nakaya nating mapatalsik ang isang presidente na may popular support mula sa masang Pilipino, bakit ang pangulo na may pinakamababang trust rating sa kasaysayan, hindi natin mapababa sa puwesto? Sa totoo lang, ang blatant ng double standard na makikita sa pagkakaiba ng treatment sa ating nakaraang dalawang pangulo.

Noon, kinilalang credible witness ang manggagamit at sugarol na si Chavit Singson dahil malapit raw siya sa akusadong si Erap. Ngayon, kino-consider na tainted witness si Angelo Zuce dahil sa pagiging manggagamit niya, at si Dinky Soliman naman dahil malapit raw siya sa akusadong si Gloria.

Noon, ang mga survey na nagsabing si GMA ay nanalo sa eleksyon ay pinangalandakang credible. Ngayon, ang mga survey na nagsabing karamihan na ng masang Pilipino ang gustong mapatalsik si GMA ay tinatawag na biased.

Noon, tinanggap nang buong buo ang tsekeng may pirmang Jose Velarde kahit hindi autheticated. Ngayon, kahit in-authenticate na ng ilang eksperto ang audio CD na may katagang "Hello, Garci" ay hindi pa rin tinanggap nang buong buo dahil mayroon daw splicing (na wala naman sa conversation kundi nasa annotation lang).

Noon, ang mga kilos protesta ay tinatawag na sigaw ng bayan. Ngayon, ang mga kilos protesta ay tinatawag na destabilization plot.

Noon, pag may school na pumapayag na umattend ang kanilang mga estudyante sa rally, pinupuri sa kanilang pagpapanitili diumano ng lumiliyab na apoy ng idealismo at aktibismo. Ngayon, ang mga estudyante na pumupunta sa rally ay iminumungkahi ng Dep Ed na i-suspend ng mga eskuwelahan dahil hindi raw dapat mag-tolerate ng ganitong klaseng undisciplined behavior.

Noon, ang pagsama ng mga pari at madre sa mga rally ay tinatawag na moral and spiritual guidance. Ngayon, ang pagsama ng mga pari at madre sa mga rally ay tinatawag na violation of the separation of church and state.

Noon, ang panghihikayat sa ilang military members na sumama sa pagkilos laban kay Erap ay pagbuo ng strategic alliance. Ngayon, ang panghihikayat sa ilang military members na sumama sa pagkilos laban kay GMA ay politicizing of the military.

Noon, pinayagan ang pag-subvert ni Manny Villar ng normal procedure sa pagtransmit ng impeachment complaint sa Senado dahil kailangan sundin ang "spirit of the law." Ngayon, pinayagang patayin ang impeachment complaint dahil sa technicalities sa ngalan ng "rule of law."

Noon, ang pag-walk out sa Senate hearing ng private prosecutors ay tinatawag na delegitimizing of a flawed process. Ngayon, ang pag-walk out ng opposition sa justice committee hearing ay tinatawag na sobrang drama at overacting.

Noon, ang pagboto ng majority ng senado laban sa pagbukas ng second envelope ay tinawag na tyranny of the majority. Ngayon, ang pagboto ng majority ng congress sa pagbasura sa impeachment complaint ay tinatawag na triumph of democracy.

Noon, nagrally laban sa pagkanulo sa Pilipinas ni Erap dahil sa pagpirma niya sa Visiting Forces Agreement. Ngayon, ok lang palusutin ang pagkanulo ni Gloria sa Pilipinas kasi kinansela na naman niya ang contract sa Venable ngayong sila ay nabuking at nahuli na.

Noon, ang pagbagsak sa ekonomiya ay sinisi sa patuloy na pananatili ni Erap sa puwesto. Ngayon, ang pagbagsak ng ekonomiya ay sinisisi sa patuloy na pagdemanda sa pagbaba ni Gloria Arroyo.

Noon, may presidente tayo (na binoto ng overwhelming plurality) na pinarusahan natin dahil sa siya ay inakusahang nagkamali at nagkasala sa bayan. Ngayon, may presidente tayo (na kaduda-duda ang panalo) na hindi natin pinarusahan dahil sa nag-sorry na siya sa kanyang lapse of judgment.

Noon, ang tawag ay People Power. Ngayon, ang tawag ay Power Grab.

Double standard.

Hypocrisy at its finest.

2 comments:

inah said...

sa totoo lng habang binabasa k ung post niyo eh parang gusto kong umiyak... ung tipong nanakit n ung dibdib m kakapigil ng luha m. ngyon gigil n gigil ako ky gloria, kc sobrang kapal ng mukha nya. khit ako mismo ngtataka kung bkit hanggang ngyon eh nakupo prin c gloria samantalang heto n at lumabas n lhat ng kasalanan niya at kamalian pero bkit hanggang ngyon wla prin??? nakakainis tlga!

little light said...

ang galing po ng mga argumento nyo..