January 21, 2006

Ako ay nasa EDSA limang taon ang nakaraan

Dumaan na pala ang anibersaryo ng EDSA Dos kahapon. Di ko man lang namalayan.

Hindi miminsang naitanong sa akin, hindi ba ako nagsisisi na sumama ako sa EDSA Dos?

Sa panahon ngayon, ang hirap sagutin ng tanong na ito. Minsan, pag pinag-iisipan ko ang sagot, naiinis ako dahil parang "nagamit" noon ang idealistic fire ng mga kabataang tulad ko ng ilang mga grupong napatunayan natin ngayong gustong mang-agaw ng kapangyarihan. Dapat ay naging mas mapangmatyag kami sa mga personalities na naglalaro noon. Sa totoo lang, ang madaliang panunumpa noon ni Gloria nang wala pang formal resignation ni Erap ay nakapagpataas na ng aking kilay. Dun pa lang ay nagkaroon na ako ng hudyat na parang...may mali.

Naniniwala ako na tama ang naging paglaban natin noon sa isang pamunuan na tiwali at sumusuway sa batas na dapat sila mismo ang nagpapatupad. Dahil ang labang ito ay naka-ugat sa prinsipyo, hindi ito dapat natapos sa pagpapalit ng nakaluklok sa panguluhan. Kung ang pamunuang pumalit ay lugmok pa rin sa katiwalian, paano natin masasabing tayo'y naging matagumpay sa ating laban?

Nakakalungkot lang na ang ilang kasama noon sa EDSA ay parang itinutumbas ang tagumpay ng nasabing pagkilos sa magiging "tagumpay" ng administrasyon ni Gloria Macapagal-Arroyo. Kaya kahit na talamak na ang katiwalian, cronyism, at political accommodations sa administrasyon ito, todo depensa pa rin ang mga EDSA Dos personalities kay Gloria. Nagbulagbulagan sa lantarang paggamit ng pera ng publiko sa pangangampanya noong 2004 elections. Nagbingibingihan sa mga nilalaman ng Hello...Garci? tapes. Nagtangatangahan sa pagsunod sa argumentong ang lesser evil lang ang tanging alternatibong makapagliligtas sa ating bansa.

Ang EDSA Dos ay hindi dapat alalahanin na tanda ng paglaban kay Erap at pagsuporta kay Gloria. Ito ay dapat alalahanin bilang paglaban sa tiwali at mapanlinlang na pamumuno at pagsuporta para sa isang tapat, malinis at huwarang gobyerno. May pagkakataon pang maitama ang pagkakasulat ng EDSA Dos sa ating kasaysayan. Kailangan lang nating ipagpatuloy at tapusin ang laban na ating sinimulan, kahit na ang mga taong nailuklok sa kapangyarihan noong EDSA Dos ang ating masagasaan.

No comments: